اسکواش- غیرملکی کھلاڑیوں پاکستان آنے کیلئے تیار

اسلام آباد(امت نیوز) پاکستان اوپن ‘ ڈی ایچ اے اور چیف آف نیول سٹاف سکوائش چیمپئن شپ کے لئے 14 غیر ملکی کھلاڑیوں نے شرکت کی تصدیق کردی ہے‘ تینوں ایونٹس نومبر اور دسمبر کے درمیان کراچی میں کھیلے جائیں گے‘ ایونٹ میں پاکستان کے نامور کھلاڑی بھی ایکشن میں نظر آئیں گے۔ پاکستان سکواش فیڈریشن کے گیم ڈویلپمنٹ آفیسر فلائٹ لیفٹیننٹ عامر اقبال نے منگل کو ”اے پی پی“ کو بتایا کہ پروفیشنل سکوائش ایسوسی ایشن (پی ایس اے) نے اسلام آباد اور لاہور کے بعد کراچی میں بھی پی ایس اے کے مقابلے بحال کرائے ہیں۔پہلا 20 ہزار ڈالر کا ایونٹ ڈی ایچ اے انٹرنیشنل سکوائش چیمپئن شپ 20 سے 24 نومبر تک کراچی میں کھیلی جائے گی۔ دوسرا 50 ہزار ڈالر کا ایونٹ پاکستان اوپن انٹرنیشنل سکوائش ٹورنامنٹ 28 نومبر سے 2 دسمبر تک جبکہ چف آف نیول سٹاف انٹرنیشنل سکوائش چیمپیئن شپ 6 سے 10دسمبر تک کراچی میں کھیلی جائے گی۔ تینوں ایونٹ میں 14 غیر ملکی کھلاڑیوں نے شرکت کی تصدیق کردی ہے جن ممالک نے شرکت کی تصدیق کی ہے ان میں ملائیشیا‘ مصر ‘ ایران ‘ فن لینڈ ‘ پیرو‘ قطر‘ میکسیکو ‘ سپین ‘ فرانس‘ چیک ریپبلک‘ ہانگ کانگ‘ پرتگال اور میزبان پاکستان شامل ہے۔ انہوں نے کہا کہ اسلام آباد اور لاہور میں پی ایس اے کے کامیاب ایونٹس کرانے کے بعد پروفیشنل سکوائش ایسوسی ایشن نے کراچی میں بھی عالمی مقابلے بحال کرنے کی اجازت دی ہے۔