پاکستان نے سیریز میں وائٹ واش پر نظریں جما لیں

دبئی(امت نیوز) پاکستان اور نیوزی لینڈ کی ٹیمیں تیسرے اور آخری ٹی ٹونٹی انٹرنیشنل کرکٹ میچ میں (آج) اتوار کو دبئی کے مقام پر آمنے سامنے ہوں گی، گرین شرٹس کو سیریز میں 2-0 کی فیصلہ کن برتری حاصل ہے، پاکستان نے سیریز کے پہلے ٹی ٹونٹی میچ میں نیوزی لینڈ کو سنسنی خیز مقابلے کے بعد 2 رنز سے شکست دے کر سیریز میں برتری حاصل کی تھی، گرین شرٹس نے دوسرے ٹی ٹونٹی میچ میں بھی عمدہ آل رائونڈ کارکردگی کا مظاہرہ کرتے ہوئے کیویز کو 6 وکٹوں سے ہرا کر سیریز میں برتری دوگنی کی۔ مسلسل فتوحات کے بعد پاکستانی ٹیم کا مورال بلند ہے اور کھلاڑیوں نے تیسرا میچ جیت کر حریف ٹیم کو سیریز میں 3-0 سے وائٹ واش کرنے پر نظریں مرکوز کر لی ہیں، دونوں ٹیموں کی حالیہ فارم اور کارکردگی کو مدنظر رکھتے ہوئے آخری ٹی ٹونٹی میچ میں کانٹے دار مقابلے کی توقع کی جا رہی ہے۔
٭٭٭٭٭