گرین شرٹس کے ہاتھوں کیویز بھی وائٹ واش-بابر کا عالمی ریکارڈ

دبئی(امت نیوز)قومی ٹیم کا ٹی ٹوئنٹی میں فتوحات کا سلسلہ برقرار ہے،آسٹریلیا کو 3-0سے زیر کرنے کے بعد قومی ٹیم نے نیوزی لینڈ کو بھی وائٹ واش کردیا۔ تیسرے ٹی ٹوئنٹی میں پاکستان نے نیوزی لینڈ کو47رنز سے شکست دے کر سیریز میں کلین سوئپ کرلیا۔ بابراعظم نے تیز ترین ایک ہزار رنز بنانے کا ریکارڈ بھارت کے ویرات کوہلی سے چھین لیا۔ انہیں میچ کا بہترین کھلاڑی قرار دیا گیا۔ جبکہ محمد حفیظ مین آف دی سیریز رہے۔ دبئی میں کھیلے گئے میچ میں پاکستان کے 167 رنز کے ہدف کے تعاقب میں نیوزی لینڈ کی پوری ٹیم 119رنزپرڈھیر ہوگئی، قومی بولرز کی نپی تلی بولنگ کے سامنے کیوی کپتان کین ولیمسن کے سوا کوئی بیٹسمین جم کرنہیں کھیل سکا، ولیمسن 60 رنز بناکر ٹاپ اسکورر رہے جب کہ اوپنر فلپس نے 26 رنز کی باری کھیلی۔نیوزی لینڈ کے 8 کھلاڑی ڈبل فیگرز میں بھی داخل نہیں ہوسکے، کولن منرو ،2 گرینڈ ہوم 6،چیپمین 2، ٹیلر 7سیفرت صفر،ساؤتھی صفر، فرگوسن اور رینس ایک ایک بناکر آؤٹ ہوئے جب کہ سوڈھی 11 رنز کے ساتھ ناٹ آؤٹ رہے۔پاکستان کی جانب سے اسپنر شاداب خان نے سب سے زیادہ 3 وکٹیں حاصل کیں،عماد وسیم اور وقاص مقصود نے 2،2اور فہیم اشرف نے ایک وکٹ حاصل کی۔قبل ازیں قومی کپتان سرفراز احمد نے ٹاس جیتا اور پہلے بیٹنگ کرنے کو ترجیح دی۔ پاکستانی بلے بازوں نے پر اعتماد بیٹنگ کرتے ہوئے مقررہ اوورز میں 3 وکٹوں کے نقصان پر 167 رنز بنائے۔قومی ٹیم کی جانب سے اننگز کا آغاز فخر زمان اور بابر اعظم نے کیا، انِ فارم بیٹسمین بابر اعظم نے ایک بار پھر شاندار باری کھیلتے ہوئے 79 رنز بنائے، انہوں نے ٹی ٹوئنٹی میں تیز رفتار 1000 رنز بنانے کا عالمی ریکارڈ بھی قائم کیا جب کہ گزشتہ میچ میں وکٹر اسٹروک کھیلنے والے محمد حفیظ 53 رنز کے ساتھ ناٹ آؤٹ رہے۔فخر زمان نے 11، شعیب ملک نے 19 اور آصف علی نے 2 رنز بنائے۔نیوزی لینڈ کی جانب سے گرینڈ ہوم نے 2اور فرگوسن نے ایک کھلاڑی کو آؤٹ کیا۔دوسری جانب پاکستان کرکٹ ٹیم کے ابتدائی بلے باز بابر اعظم ٹی ٹوئنٹی کرکٹ میں تیز ترین ایک ہزار رنز بنانے والے کھلاڑی بن گئے ہیں۔بابر اعظم نے یہ اعزاز دبئی کے شیخ زید اسٹیڈیم میں نیوزی لینڈ کے خلاف تیسرے ٹی ٹوئنٹی میچ میں حاصل کیا۔بابر اعظم نے ایک ہزار ٹی ٹوئنٹی رنز 26 اننگز میں مکمل کیے اور بھارتی کپتان ویرات کوہلی کو پیچھے چھوڑ دیا۔بھارتی ٹیم کے کپتان ویرات کوہلی نے ایک ہزار ٹی ٹوئنٹی رنز 27 اننگز میں مکمل کیے تھے جب کہ آسٹریلیا کے ایرون فنچ نے یہ سنگ میل 29 میچز کھیل کر عبور کیا تھا۔خیال رہے کہ بابراعظم ٹی ٹوئنٹی رینکنگ میں بھی پہلے نمبر پر ہیں۔واضح رہے کہ پاکستان نے نیوزی لینڈ کو دوسرے ٹی ٹوئنٹی میچ میں 6 وکٹوں سے شکست دیتے ہوئے 0-2 سے فیصلہ کن برتری کیساتھ مسلسل 11 ویں سیریز جیتنے کا ریکارڈ قائم کیا تھا،ایک کیلنڈر ایئر میں 16 فتوحات کے ساتھ دنیا بھر کی ٹیموں کو پیچھے چھوڑااور اب گرین شرٹس نے مسلسل چوتھے کلین سوئپ کا اعزاز اپنے نام کرلیا ہے۔