تیز رفتار گاڑیوں نے خاتون-معمر شخص سمیت 3افراد کچل ڈالے
کراچی (اسٹاف رپورٹر) مختلف علاقوں میں تیز رفتار گاڑیوں نے خاتون اور معمر شخص سمیت 3افراد کو کچل ڈالا۔ تفصیلات کے مطابق ٹیپوسلطان کے علاقے شارع فیصل بلوچ کالونی پل کے نیچے نامعلوم گاڑی کی ٹکر سے 45سالہ محمودہ بیگم زوجہ صابر علی جاں بحق ہوگئی۔ سرجانی ٹاؤن کے علاقے بابا موڑ کے قریب نامعلوم گاڑی کی ٹکر سے 20سالہ ناظم ولد منشا جاں بحق ہوگیا۔ متوفی سرجانی کا رہائشی تھا۔ گلشن معمار کے علاقے سپرہائی وے ناردن بائی پاس پر نامعلوم گاڑی کی ٹکر سے 70سالہ مولا بخش ولد یار محمد جاں بحق ہوگیا، متوفی سپرہائی کا رہائشی تھا۔
