اسلحہ – بھارتی چھالیہ کراچی اسمگل کرنے کی کوشش ناکام – 2 گرفتار

کراچی(اسٹاف رپورٹر) کوسٹ گارڈ اور پولیس نے اسلحہ اور بھارتی چھالیہ کی بڑی کھیپ کراچی اسمگل کرنے کی کوشش ناکام بنادی۔2 ملزمان کو گرفتار کرلیا گیا۔بھوسے کے ٹرک میں 25 ٹن چھالیہ بلوچستان اور مسافر بس میں اسلحہ پشاور سے لایا جارہا تھا۔تفصیلات کے مطابق سکھن پولیس نے خفیہ اطلاع پر کارروائی کرتے ہوئے ٹرک نمبر JY-8477 کو روک کر بھوسے کے نیچے چھپائی ہوئی 25 ٹن بھارتی چھالیہ کے 39 بوریاں برآمد کرتے ہوئے ملزم محمود خان کو گرفتار کرلیا۔ملزم بلوچستان سے ٹرک میں بھوسے کے نیچے بھارتی چھالیہ چھپا کر کراچی لایا تھا، تاہم پولیس نے بھارتی چھالیہ کی بڑی کھیپ اسمگل کرنے کی کوشش ناکام بنادی۔پولیس کے مطابق ملزم ڈرائیور نے بتایا کہ وہ اسی ٹرک میں چھالیہ اسمگل کرتا ہے۔بعد ازاں ملزم کو کسٹم حکام کے حوالے کیا گیا ہے۔ دریں اثنا پاکستان کوسٹ گارڈز چیکنگ کے دوران سپرہائی وے چیک پوسٹ پر ڈائیوو بس میں موجود پارسل سے 10پستول برآمد کرکے ایک شخص کو گرفتار کرلیا۔برآمد غیر قانونی ہتھیار پشاور سے کراچی پارسل کے ذریعے اسمگل کئے جارہے تھے۔