کارروائی کے دوران ریگل چوک روڈ بند ہونے سے بد ترین ٹریفک جام

کراچی (اسٹاف رپورٹر) آپریشن کے دوران نعمان سینٹر۔ ریگل چوک روڈ بند ہونے سے صدر میں بدترین ٹریفک جام ہوگیا ہزاروں شہری گھنٹوں ٹریفک جام میں پھنسے رہے ۔جبکہ مریضو ں کو اسپتال لانے والی ایمبولینسوں کو بھی مشکلات کا سامنا رہا ۔تفصیلات کے مطابق تجاوزات کے خلا ف آپریشن کے دوران نعمان سینٹر ۔ریگل چوک روڈ عام ٹریفک کیلئے بند کردی گئی تھی جس کی وجہ سے نیوپریڈی اسٹریٹ ، زیب النسا اسٹریٹ ،ریگل ، سی بریز اور اطراف کی سڑکوں پر بدترین ٹریفک جام ہوگیا اور گاڑیوں کی لمبی قطاریں لگ گئیں ، ٹریفک جام میں ایمبولینسیں بھی پھنس گئیں ۔دفاتر سے گھروں کو جانے والے شہری بھی اذیت میں مبتلا رہے ، جبکہ اس دوران ٹریفک پولیس کے اہلکار کہیں نظر نہ آئے ۔