بیجنگ کے غلط اسپیلنگ لکھنے کے معاملے پرایم ڈی پی ٹی وی فارغ

اسلام آباد(مانیٹرنگ ڈیسک)وزیراعظم عمران خان کے چین میں خطاب کے دوران نشر ہونے والی غلطی پر ایم ڈی پی ٹی وی کو عہدے سے ہٹادیا گیا۔وفاقی وزارت اطلاعات نے کرنل ریٹائرڈ حسن سے ایم ڈی پی ٹی وی کا چارج واپس لے لیا ہے۔ وزیر اطلاعات فواد چوہدری نے کرنل ریٹائرڈ حسن عماد محمدی سے چارج واپس لینے کی منظوری دیتے ہوئے نوٹیفکیشن جاری کردیا ہے اور فیصلہ کا اطلاق فوری طور پر ہوگا۔وزیراعظم کی بیجنگ میں تقریر کے دوران پاکستان ٹیلی ویژن نے اسکرین پر چین کے دارالحکومت Beijing کو انگریزی میں ’’بیجنگ‘‘ کے بجائے لفظ ’’بیگنگ‘‘ لکھ دیا تھا ۔ پی ٹی وی نے اس غلطی پر بھی معذرت کرلی تھی۔ Begging ’’بیگنگ‘‘ کے معنی ’’بھیک مانگنے‘‘ کے ہیں۔ معاملے پر پی ٹی وی کے 3 ڈائریکٹرز کے خلاف محکمانہ انکوائری جاری ہے اور دو ملازمین کو پہلے ہی معطل کیا جا چکا ہے۔ کرنل ریٹائرڈ حسن عماد محمدی کو 22 اکتوبر کو ایم ڈی پی ٹی وی کا چارج دیا گیا تھا۔