لیاری میں خاتون پراسرار طور پر جھلس کر جاں بحق-بیٹا -سسر زخمی

کراچی (اسٹاف رپورٹر)لیاری دھوبی گھاٹ میں خاتون پراسرارطور پر جھلس کر جاں بحق،جبکہ بیٹا اور سسر زخمی ہو گئے ۔ ایس ایچ او حق نواز نے امت کو بتایا کہ اہلخانہ کے مطابق متوفیہ فوزیہ گھر میں کپڑے استری کررہی تھی کہ وہ جلتی استری کپڑےپر چھوڑ کر دوسرے کام کرنے لگی اسی دوران آگ بھڑک اٹھی ، متوفیہ اپنے بیٹے یاسر کو گود میں اٹھائے آگ بجھانے کی کوشش کررہی تھی کہ آگ نے اسے اپنی لپیٹ میں لے لیا ، جبکہ گھر میں موجود متوفیہ کے سسر محمد یونس بچے کو بچاتے ہوئےخود بھی جھلس کر زخمی ہوگیا۔ پولیس اس حوالے سے تفتیش کررہی ہے کہ متوفیہ کو جلایا گیا یا وہ اتفاقیہ طور پر جھلس کر ہلا ک ہوئی ہے۔دریں اثنا شادمان ٹاؤن کے ڈی اے فیز تھری میں گیزر پھٹنے سےدو فلیٹوں میں آگ بھڑک اٹھی جس کے باعث لاکھوں سامان خاکستر ہوگیا ، فائر بریگیڈ کی 3گاڑیوں نے آگ پر قابو پایا۔ آ تشزدگی کے باعث فلیٹوں کے رہائشی جانیں بچانے کیلئےباہر نکل آئے اور فائر بریگیڈ کو اطلاع دی ، فائر بریگیڈ کی ایک گاڑی نے موقع پر پہنچ کر آگ بجھانے کی کوشش کی آگ کی شدت دیکھتے ہوئے مزید دو گاڑیوں کو طلب کیا گیا ، جنہوں نے دو گھنٹےکی جدوجہد سے آگ پر قابو پایا ، فائر بریگیڈ حکام کے مطابق آگ عمارت کی چوتھی منزل پر لگی تھی۔