پشاور میں 6 کروڑ کی جعلی کرنسی پکڑی گئی

پشاور(نمائندہ امت) پولیس پشاورنے وفاقی خفیہ ادارے کے تعاون سے شہر میں قائم جعلی کرنسی فیکٹری سے 6 کروڑ کے قریب جعلی کرنسی بر آمد کر لی ۔نوٹ چھاپنے والی مشین اور دیگر سامان کو بھی تحویل میں لے لیا ۔جعلی کرنسی بنانے میں ملوث9 ملزمان کے گروہ کو بے نقاب کرتے ہوئے 3ملزمان کو گرفتار کر لیا گیا ۔ ملزمان مزید17کروڑ جعلی نوٹ چھاپ کرسپلائی کرنا چاہتے تھے۔تفصیلات کے مطابق سی سی پی او قاضی جمیل الرحمان کو خفیہ ذرائع سے اطلاع ملی تھی کہ کچھ جعل ساز عناصر پشاور کے نواحی علاقہ میں بڑے پیمانہ پر جعلی کرنسی بنانے کے مکروہ دہندے میں ملوث ہیں جو جعلی کرنسی بنا کر ملک کے دوسرے شہروں کوسپلائی کرنا چاہتے ہیں ۔ایس ایس پی آپریشن جاوید اقبال کی سربراہی میں خصوصی ٹیم تشکیل دیتے ہوئے جعلی کرنسی بنانے میں ملوث ملزمان کو ٹریس کرکے گرفتار کر نے کا ٹاسک حوالہ کیا ۔ایس ایس پی آپریشن جاوید اقبال کی سربراہی میں ڈی ایس پی سبرب فضل واحد خان، ایس ایچ او تھانہ آغہ میر جانی شاہ عباد وزیر اور ایس ایچ او تھانہ بھانہ ماڑی واجد خان نے کارروائی کرتے ہوئے رنگ روڈ چوک میں ایک ملزم امجد ولد بہادر نواز سکنہ درہ آدم خیل کو گرفتار کر لیا جس نے تفتیش کے دوران جعلی کرنسی بنانے میں ملوث ہونے کا اعتراف کیا اور اس کی نشاندہی پرشہر کے نواحی علاقہ کاکشال کے ایک گھر میں قائم جعلی کرنسی فیکٹری پر چھاپہ مار کر 2دیگر ملزمان ساجد منصورولد عبدالرشید سکنہ کاکشال جس کے گھر میں جعلی کرنسی کی فیکٹری قائم کی گئی تھی اور ارشد ولدقریش سکنہ اتمانزئی چارسدہ کو گرفتار کر لیا جبکہ جعلی کرنسی بنانے والی مشینری، پرنٹرز، کٹرمشین اور دیگر سامان کے ساتھ ساتھ 6 کروڑ کے قریب جعلی کرنسی بھی تحویل میں لے لی ۔ملزمان نے اعتراف کرتے ہوئے کہا کہ وہ مزید17کروڑ جعلی رقم بناکر دیگر شہروں کو سپلائی کرنا چاہتے تھے ۔ملزمان کو مزید تفتیش کے لئے حوالات منتقل کر دیا گیا ہے ۔