گھروں میں ڈکیتیاں کرنے والے گروہ کے 3کارندے پکڑے گئے

کراچی(اسٹاف رپورٹر) ڈیفنس میں پولیس نے کامیاب کارروائی کرتے ہوئے گھروں میں ڈکیتیاں کرنے والے گروہ کے 3 کارندوں اور ڈانس پارٹیز میں منشیات فروخت کرنے والے ملزم کو گرفتار کرکے اسلحہ منشیات اور مسروقہ سامان برآمد کرلیا۔ اے ایس پی کلفٹن نے اپنے دفتر میں پریس کانفرنس کرتے ہوئے بتایا کہ کلفٹن پولیس نے کارروائی کے دوران گھروں میں ڈکیتی کرنے والے گروہ کے تین ملزمان کو گرفتار کیا ملزمان جرائم پیشہ ہیں اور اس سے قبل بھی گرفتار ہوچکے ہیں،اے ایس پی کلفٹن نے مزید بتایا کہ پولیس نے دوسری کارروائی میں منشیات فروش زوہیب کو گرفتار کیا،ملزم زوہیب ڈانس پارٹی میں آئس فراہم کرتا ہے،ملزم ذوہیب کے دو ساتھی پہلے ہی گرفتار ہیں جبکہ مزید دو ساتھیوں کی تلاش جاری ہے،گرفتار ملزمان کے قبضے سے منی کلاشنکوف،منشیات اور آئس کے نشے میں استعمال ہونے والا سامان برآمد کیا گیاہے۔