کورنگی سے 5 ماہ قبل اغوا ہونیوالی بچی اسی مقام سے مل گئی

کراچی(اسٹاف رپورٹر) کورنگی سے 5 ماہ قبل اغوا ہونیوالی کمسن بچی اسی مقام سے مل بھی گئی۔ تفصیلات کے مطابق عوامی کالونی کے علاقے کورنگی نمبر 5 ماڈل پارک سے 26 جون 2018کو 4 سالہ بچی بسمہ دختر عاشق حسین پراسرار طور پر لاپتہ ہو گئی تھی، جس کا مقدمہ 221/18مغویہ کے والد کی مدعیت میں نامعلوم ملزمان کیخلاف درج کیا گیا تھا۔ پولیس نے بتایا کہ پیر کی صبح پولیس کو اطلاع ملی کہ کورنگی 5کے ماڈل پارک سے ایک 4 سالہ لاوارث بچی ملی ہے، جس پر پولیس نے بچی تحویل میں لیکر تھانے منتقل کردی، جہاں اس کو بسمہ کے نام سے شناخت کر لیا گیا۔ پولیس نے کہا کہ بچی کو جس نے بھی اغوا کیا تھا، اس نے گرفتاری کے خوف یا کسی اور وجہ سے بچی کو اسی مقام پر چھوڑ دیا جہاں سے اغوا کیا تھا۔ ملزمان کی گرفتاری کے بعد اصل حقائق سامنے آئیں گے۔