مصباح الحق کی پشاور زلمی میں شمولیت خوش آئند قرار

اسلام آباد (امت نیوز)پاکستان سپر لیگ (پی ایس ایل) فرنچائز پشاور زلمی کے مالک جاوید آفریدی نے کہاہے کہ مصباح الحق کی شمولیت سے پشاور زلمی کی ٹیم میں تجربے کے ساتھ ساتھ کرکٹ کی دانشمندی کا بھی اضافہ ہوا ہے۔نجی ٹی وی سے بات چیت کرتے ہوئے جاوید آفریدی نے کہا کہ مصباح الحق اب بھی کرکٹ کھیلتے ہیں اور مسلسل فرسٹ کلاس کرکٹ کے دوران ایکشن میں ہیں اس لیے امید ہے کہ وہ پاکستان سپر لیگ 4 میں بھی اچھی کارکردگی کا مظاہرہ کریں گے۔انہوںنے کہاکہ مصباح الحق نوجوان کرکٹرز کیلئے ایک رول ماڈل ہیں، ان کی ڈریسنگ روم اور فیلڈ میں موجودگی کپتان ڈیرن سیمی کیلئے بھی کافی مددگار ثابت ہوگی۔جب جاوید آفریدی سے پوچھا گیا کہ سیمی کی موجودگی میں مصباح کا کیا کردار ہوگا تو انہوں نے کہا کہ سیمی بطور کپتان زلمی کے ہیڈ ہیں ٗوہ دو بار ویسٹ انڈیز کو ورلڈ ٹی ٹوئنٹی جتواچکے ہیں اور ساتھ ساتھ زلمی کو بھی پی ایس ایل ٹائٹل جتوا چکے ہیں جبکہ مصباح الحق دو بار پی ایس ایل چیمپئن رہے۔ یہ دونوں امر ٹیم زلمی کے کھلاڑیوں کو بہتر سے بہتر کرنے کیلئے متاثر کرے گا۔ٹیم کے انتخاب پر خوشی کا اظہار کرتے ہوئے انہوں نے کہا کہ تین سال سے زلمی کی ٹیم کا حصہ رہنے والے تمام کھلاڑی چوتھے ایڈیشن میں بھی ٹیم زلمی کے ساتھ ہیں۔