پاکستان میں غیر ملکی اسکواش کھلاڑیوں کی آمد کا سلسلہ شروع
اسلام آباد(امت نیوز) پاکستان سکوائش فیڈریشن کے زیر اہتمام پاکستان اوپن مینز اینڈ ویمنز انٹرنیشنل سکوائش ٹورنامنٹ میں شرکت کیلئے غیر ملکی کھلاڑیوں کی آمد کا سلسلہ منگل کو شروع ہو گیا۔ تمام کھلاڑی منگل کی رات تک پاکستان پہنچ جائیں گے۔ پاکستان سکواش فیڈریشن کے گیم ڈویلپمنٹ آفیسر سکوارڈن لیڈرعامر اقبال نے بتایا کہ ایونٹ میں شرکت کیلئے مصر اور ملائیشیا کے غیر ملکی کھلاڑی پاکستان پہنچ چکے ہیں جبکہ باقی پانچ ممالک کے غیر ملکی کھلاڑی منگل کی رات تک پہنچ جائیں گے۔ انہوں نے کہاکہ ایونٹ (آج) بدھ سے کراچی میں شروع ہو گا جو 2 دسمبر تک جاری رہے گا۔ ایونٹ میں مصر کے کریم عبدلگواد ٹاپ سیڈ ہوں گے۔
