ٹرین-تیز رفتار گاڑیوں نے معمر خاتون سمیت 4 افراد کو کچل دیا

کراچی (اسٹاف رپورٹر) نیو سبزی منڈی۔ شارع نورجہاں اور گلبائی موڑ پر تیز رفتار گاڑیوں نے معمر خاتون سمیت 3 افراد کو کچل دیا، جبکہ شاہ فیصل میں 35 سالہ شخص ٹرین کی ٹکر سے مارا گیا۔ صدر میں سوزوکی اور ٹرک کے تصادم میں 5 افراد زخمی ہوگئے۔ تفصیلات کے مطابق سائٹ سپرہائی وے صنعتی ایریا کے علاقے سپرہائی وے نیو سبزی منڈی کے قریب نامعلوم گاڑی کی ٹکر سے سڑک عبور کرنے والی 50سالہ خاتون جاں بحق ہوگئی۔ پولیس نے نامعلوم متوفیہ کی لاش شناخت کیلئے سرد خانے میں رکھوادی ہے۔ شاہراہ نورجہاں کے علاقے نارتھ ناظم آباد قلندریہ چوک کے قریب نامعلوم گاڑی کی ٹکر سے 50سالہ منظور حسین ولد امام بخش جاں بحق ہوگیا۔ سائٹ بی کے علاقے گلبائی موڑ کے قریب نامعلوم گاڑی کی ٹکر سے 35سالہ اشرف ولد عبدالرحمان جاں بحق ہوگیا۔ پریڈی کے علاقے صدر جہانگیر پارک کے قریب سوزوکی اور ٹرک میں تصادم کے نتیجے میں عظیم ، امجد ، وحید ، طارق اور سعیدو زخمی ہوگئے، جنہیں فوری قریبی اسپتال پہنچایا گیا۔ دوسری جانب شاہ فیصل فلک ناز پلازہ عقب میں واقع ریلوے ٹرین کے پاس واقع نالے سے 35سالہ سلمان ولد ولی محمد کی لاش ملی ہے۔