اسرائیلی فوج سرنگوں کی تلاش میں خان یونس میں گھس آئی

غزہ (این این آئی)اسرائیلی فوج نے ٹینکوں اور فوجی گاڑیوں کے ہمراہ جنوبی غزہ کے شہر خان یونس پر دھاوا بول دیا اور سرنگوں کی تلاشی کی آڑ میں گھس کر کئی سو میٹر کھدائی کردی۔ اطلاعات کے مطابق اسرائیلی فوج 4 بلڈوزروں کے ہمراہ خان یونس کے ’السناطی‘ گیٹ سے غزہ میں داخل ہوئی فوج کے ساتھ کئی بکتر بند گاڑیاں بھی تھیں۔ اسرائیلی فوج نے عبسان کے مقام پر کھدائی کی جس کے نتیجے میں علاقے میں خوف وہراس پھیل گیا۔دریں اثنا انسانی حقوق کی عالمی تنظیم نے خبردار کیا ہے کہ غزہ کی پٹی میں اسرائیلی فوج کی فائرنگ سے زخمی مظاہرین کو علاج کی سہولت میسر نہیں ہے جس کے باعث ان کی زندگیوں کو شدید خطرات لاحق ہیں۔رپورٹ میں کہا گیا ہے کہ غزہ کی مشرقی سرحد پر مظاہروں کے دوران گولیاں لگنے سے زخمی فلسطینیوں میں سے بیشتر زندگی اور موت کی کشمکش میں ہیں۔ ڈاکٹرز ود آؤٹ باؤنڈریزنے عالمی برادری پر زور دیا ہے کہ وہ غزہ کی پٹی میں زخمی فلسطینیوں کی زندگیاں بچائیں۔