سی ٹی ڈی کی کارروائی میں متحدہ لندن کا ٹارگٹ کلر پکڑا گیا

کراچی(اسٹاف رپورٹر)سی ٹی ڈی نے کورنگی نمبر ڈھائی میں کارروائی کرتے ہوئے متحدہ قومی موومنٹ لندن کے ٹارگٹ کلر محمد سلیم عرف ماما عرف کورنگی والا کو گرفتار کرکے اسلحہ برآمد کرلیا۔دوران تفتیش ٹارگٹ کلر نے سب انسپکٹر محمد بخش کو ابراہیم حیدری کے علاقے میں 2006 میں قتل کرنے سمیت مزید 3 افراد کی ٹارگٹ کلنگ کا اعتراف کیا ہے، جبکہ سی ٹی ڈی نے دوسری کارروائی میں نورس چورنگی سائٹ ایریا کے قریب سے 2 ملزمان محمد صدیق عرف لالو اور حسین عرف چھوٹا حسین کو گرفتار کرکے اسلحہ برآمد کرلیا۔گرفتار ہونے والے ملزمان نے دوران تفتیش ضلع ویسٹ کے مختلف علاقوں میں 50 سے زائد اسٹریٹ کرائم کی وارداتیں کرنے کا اعتراف کیا ہے۔سہراب گوٹھ پولیس نے ٹارگٹ کلر عالم بنگالی گروپ کے ٹارگٹ کلر ناصر عرف کالا کو گرفتار کرلیا۔ ٹارگٹ کلر عالم بنگالی کا ساتھی اور عالم بنگالی کراچی میں آپریشن شروع ہونے کے بعد دبئی فرار ہوگیا ہے اور آجکل بھی دبئی میں ہے۔