سنگین وارداتوں میں مطلوب ڈاکو مقابلے کے بعد گرفتار

حیدر آباد (بیورو رپورٹ) حیدر آباد پولیس نے پولیس مقابلے لوٹ مار، اسٹریٹ کرائم سمیت درجنوں سنگین جرائم میں ملوث ڈاکو شاہد عرف شاہو کو زخمی حالت میں گرفتارکرنے کا دعویٰ کیا ہے۔ پولیس کے مطابق حالی روڈ پولیس نے دوران پیٹرولنگ گولیمار لنک روڈ نزد برکت بھائی ٹاؤن پر موٹر سائیکل پر سوار3 مشکوک افراد کو روکنے کی کوشش کی تو انہوں نے مبینہ طور پر پولیس پر فائرنگ کر دی پولیس نے جوابی کارروائی اور مقابلے کے بعد شاہد عرف شاہو ولد خدا بخش میرانی کو زخمی حالت میں گرفتارکر لیا، پولیس کے مطابق ملزم کے قبضے سے اسلحہ اور موٹر سائیکل بھی برآمد کی گئی ہے، ملزم شاہد عرف شاہو 50 سے زائد پولیس مقابلوں، لوٹ مار، اسٹریٹ کرائمز اور منشیات سمیت دیگر سنگین جرائم میں ملوث رہا ہے، صرف حالی روڈ تھانہ پر ہی اس کے خلاف 14 سے زائد مقدمات درج ہیں۔