بنگلہ دیش- ویسٹ انڈیز کا فیصلہ کن میچ میں ہوپ مرکز توجہ

سلہٹ (امت نیوز) بنگلہ دیش اور ویسٹ انڈیز کی کرکٹ ٹیموں کے درمیان تین ایک روزہ بین الاقوامی میچوں پر مشتمل سیریز کا تیسرا اور آخری میچ (کل) جمعہ کو سلہٹ میں کھیلا جائے گا۔ دونوں ٹیموں کے درمیان تین میچوں کی سیریز 1-1 سے برابر ہے۔ بنگلہ دیش کی ٹیم نے کالی آندھی کو پہلے ون ڈے کرکٹ میچ میں 5 وکٹوں سے شکست دی تھی۔ تاہم دوسرے ون ڈے میں شائی ہوپ کے ناقابل شکست 146 رنز کی بدولت کالی آندھی نے میزبان ٹیم کو 4 وکٹوں سے شکست دیکر سیریز 1-1 سے برابر کر دی۔ اس سے قبل کالی آندھی کو ٹیسٹ سیریز میں میزبان ٹیم کے ہاتھوں عبرتناک شکست سے دو چار کیا تھا۔ دونوں ٹیموں کے کپتانوں نے سیریز میں کامیابی کیلئے بیانات دیئے اور توقع کی جارہی ہے کہ سیریز کا تیسرا اور آخری میچ سخت اور کانٹے دار ہوگا۔ واضح رہے کہ ون ڈے سیریز کے بعد دونوں ٹیموں کے درمیان تین ٹی ٹونٹی میچوں پر مشتمل سیریز کا پہلا میچ 17 دسمبر، دوسرا میچ 20 دسمبر جبکہ تیسرا اور آخری میچ 22 دسمبر کو کھیلا جائیگا۔