6 کم عمر لفٹر گرفتار – 9 موٹر سائکلیں ضبط

کراچی (اسٹاف رپورٹر)سرسید پولیس نے کم عمر چوروں پر مشتمل6 رکنی موٹر سائیکل لفٹر گروہ گرفتار کرلیا، ملزمان سے 9 گاڑیاں ملی ہیں، ملزمان نے ضلع وسطی سے درجنوں گاڑیاں چرانے کا اعتراف کیا ہے۔ تفصیلات کے مطابق سرسید پولیس نے14 سے 18 سال تک عمر کے 6 موٹر سائیکل لفٹرز کو گرفتار کرتے ہوئے ان سے 9موٹر سائیکلیں برآمد کرلیں۔ پولیس کا کہنا ہے کہ گرفتار ملزمان میں عامر حیدر، خیراللہ، کامران، سلیم عرف کھاچھیا، خان ولی اور شہزاد شامل ہیں۔ایس ایچ او شکیل جاوید نے ’’امت‘‘ کو بتایا کہ گروہ بائیک چوری کا ماہر گروہ ہے ،نارتھ کراچی کی کچی آبادیوں کے رہائشی ملزمان شہر کی مختلف مارکیٹوں اور گھروں کے باہر بغیر لاک موٹر سائیکلوں کی تاریں جوڑ کر اسٹارٹ کرنے کے بعد لے جاتے تھے، انہوں نے زیادہ تر گاڑیاں کباڑیوں کو فروخت کی ہیں۔ انہوں نے مزید بتایا کہ ملزمان کچی آبادیوں میں بھی پارٹس فروخت کرتے تھے اور گاڑی کا چیسز اور انجن کا مین پیس نالوں اور کچرا کنڈیوں میں پھینک دیتے تھے ملزمان نے ضلع وسطی سے درجنوں موٹر سائیکلیں چوری کرنے کا اعتراف کیاہے، ان سے تفتیش جاری ہے، مزید گرفتاریاں بھی متوقع ہیں۔