رینجرز-پولیس کے ہاتھوں2متحدہ لندن کارکنوں سمیت 30گرفتار

کراچی (اسٹاف رپورٹر)رینجرز اور پولیس آپریشن میں متحدہ لندن کے 2کارکنوں سمیت 30ملزمان کو گرفتار کرکے اسلحہ، منشیات اور گٹکا برآمد کرلیا گیا۔ تفصیلات کے مطابق رینجرز نے سولجر بازار اور کورنگی صنعتی ایریا میں کارروائی کرتے ہوئے متحدہ لندن کے 2کارکنوں راحیل عرف ملان اور سمویل خان عرف بادشاہ کوگرفتار کرلیا، ملزمان اسٹریٹ کرائم کی متعدد وراداتوں میں ملوث ہیں۔ اسی طرح زمان ٹاؤن میں کارروائی کے دوران ملزم خالد پکڑا گیا جو قتل اور اقدام قتل کی متعدد وارداتوں میں ملوث ہے۔ ماڈل کالونی ، نبی بخش، اور کلفٹن میں رینجرز کارروائیوں میں 4ملزمان عقیل ، ظہیر ، جہانگیر اور سنیل اشرف کو گرفتار کیا گیا جو مسروقہ موٹر سائیکلوں کی خریدو فروخت میں ملوث ہیں۔ سچل پولیس نے ابوالحسن اصفہانی روڈ پر واقع اقرا سٹی میں فلیٹ پر قبضے کی کوشش ناکام بناتے ہوئے ملزم وکیل کو گرفتار کرکے اس سے اسلحہ برآمد کرلیا، ملزم کے دیگر ساتھی فرار ہونے میں کامیاب ہوگئے، ملزم پولیس اور دیگر اداروں کے نام پر بھتہ بھی لیتا تھا، ملزم اور اس کے ساتھی خالی فلیٹس اور مکانات پر قبضہ کر کے فروخت کرتے تھے۔ مبینہ ٹاؤن پولیس نے مقابلے کے بعد 5 ملزمان کو گرفتار کرلیا، ملزمان سے دستی بم، ایک نائن ایم ایم اور 4پستولوں کے علاوہ 2ڈیجیٹل کیمرے اور نقدی ملی ہے، ملزمان امجد عرف پپو، نوید عرف باٹیہ، علی رضا، ممتاز عرف رضوان اور مرید کیخلاف دہشت گردی، پولیس پر فائرنگ اور اقدام قتل سمیت دیگر دفعات کے تحت مقدمے مقدمے درج کرکے تفتیش شروع کردی گئی ہے۔ کو رنگی صنعتی ایریا پولیس نے ملزمل عمر شاہ کو گرفتار کرکے اس سے بھاری مقدار میں گٹکا برآمد کرلیا۔ اسی پولیس نے مختلف کارروائیوں میں 5ملزمان عبدالستار، غلام یاسین، عبدالرزاق، غلام مرتضی، حضور بخش اور طالب حسین ایک اور کاررروائی میں ملزم سلیمان، افتخار اور بشیر کو گرفتار کرکے اسلحہ اور شراب برآمد کرلی۔ زمان ٹاؤن پولیس نے ملزم دلدار کو گرفتار کرکے بھاری مقدار میں چرس برآمد کرلی۔ شاہ فیصل کالونی پولیس نے ملزم ولسن کو گرفتار کرکے شراب برآمد کرلی۔ سکھن میں ملزم عرس چرس سمیت پکڑا گیا۔ زمان ٹاؤن پولیس نے ملزم شعیب کو گرفتار کرکے اسلحہ برآمد کرلیا۔ سچل پولیس نے ملزم شیراز کو گرفتار کرلیا۔ سولجر بازار پولیس نے ملزم شاہ رخ ، راحیل اور قاسم کو گرفتار کرلیا۔ عوامی کالونی پولیس نے 2ملزمان وارث اور قدیم خان کو گرفتار کرکے گٹکا برآمد کرلیا۔ شرافی گوٹھ پولیس نے ملزم ارشد اور سعید عمر کو گرفتار کرکے اسلحہ برآمد کرلیا ۔