فوٹیج کی مدد سے 4 رکنی ڈکیت گروہ پکڑگیا

کراچی(اسٹاف رپورٹر)سی ٹی ڈی نے سی سی ٹی وی فوٹیج کی مدد سے 4 رکنی ڈکیت گروپ کو پکڑلیا۔ملزمان دودھ کی دکانوں کو لوٹنے سمیت ضلع شرقی اور وسطی میں متعدد وارداتوں میں ملوث ہیں۔تفصیلات کے مطابق کاؤنٹر ٹیرارزم ڈیپارٹمنٹ پولیس نے ماڑی پور ٹرک اڈے کے قریب کارروائی کرتے ہوئے 4 رکنی ڈکیت گروپ کے کارندوں عبدالہادی عرف بادل، محب اللہ عرف لالو، محمد عارف خان اور محمد رئیس عرف چکڑی کو گرفتار کرلیا۔گروپ مختلف علاقوں میں اسٹریٹ کرائم کی متعدد وارداتوں میں ملوث ہے ۔ملزمان کی گرفتاری سی سی ٹی وی فوٹیج کی مدد سے عمل میں آئی ہے۔ملزمان نے ضلع وسطی اور شرقی میں متعدد کارروائیوں کا انکشاف کیا ہے ۔ملزمان نے تھانہ گبول اور تھانہ سچل کے علاقہ میں دودھ کی دکانوں پر وارداتیں کی تھی۔