موٹر سائیکل-کارلفٹر گروہوں کے2کارندے گرفتار-5گاڑیاں برآمد
کراچی(اسٹاف رپورٹر)اینٹی کارلفٹنگ سیل پولیس نے نارتھ ناظم آباد میں کارروائی کرتے ہوئے 2 موٹر سائیکل لفٹر کو گرفتار کرکے 4 موٹر سائیکلیں برآمد کرلیں، جبکہ سپرہائی وے پر مقابلے کے بعد ملزمان کار چھوڑ کر فرار ہوگئے۔تفصیلات کے مطابق اینٹی کارلفٹنگ سیل پولیس نے نارتھ ناظم آباد فائیو اسٹار چورنگی کے قریب کارروائی کرکے انتہائی مطلوب موٹر سائیکل لفٹر گروپ کے 2 کارندوں ملک ثاقب اور محمد نعیم کو گرفتار کرکے چھینی ہوئی 4 موٹر سائیکلیں برآمد کرلیں۔ملزمان کئی سالوں سے مختلف علاقوں سے اسلحہ کے زور پر موٹر سائیکلیں چھیننے اور پارکنگ ایریا سے موٹر سائیکلیں چوری کرنے کی وارداتیں کررہے تھے۔ملزمان موٹر سائیکلیں چوری کرنے کے بعد انکے پارٹس کھول کر شہر کی مختلف مارکیٹوں میں فروخت کرتے تھے اور موٹر سائیکلوں کے چیسسز شہر کے مختلف علاقوں میں پھینک دیتے تھے ۔ادھر اینٹی کارلفٹنگ سیل پولیس نے سپرہائی وے پر کارروائی کرتے ہوئے کار نمبر BCK-328میں سوار ملزمان کو روکنے کا اشارہ کیا تو ملزمان نے فائرنگ کرتے ہوئے فرار ہونے لگے۔ پولیس نے تعاقب کیا تو ملزمان کار چھوڑ کر فرار ہوگئے۔ پولیس کا کہنا ہے کہ مذکورہ کار ملزمان نے یوسف پلازہ سے چھینی تھی اور کار چھیننے کے بعد مذکورہ کار کو بلوچستان لے کر لے جانا چاہتے تھے ۔
