نیوزی لینڈ نے سری لنکا کیخلاف ٹیسٹ سیریز جیت لی

کرائسٹ چرچ(امت نیوز) نیوزی لینڈ نے سری لنکا کو دوسرے اور آخری کرکٹ ٹیسٹ میچ میں یکطرفہ مقابلے کے بعد 423 رنز سے شکست دے کر سیریز 1-0 سے جیت لی، سری لنکن ٹیم پانچویں اور آخری روز 660 رنز کے ہدف کے تعاقب میں دوسری اننگز میں 236 رنز بنا کر آئوٹ ہو گئی، ٹرینٹ بولٹ نے میچ میں 9 وکٹیں لیں، ٹم سائوتھی کو عمدہ آل رائونڈ کارکردگی کا مظاہرہ کرنے پر میچ کے بہترین کھلاڑی کا ایوارڈ دیا گیا۔ اتوار کو کرائسٹ چرچ ٹیسٹ کے پانچویں اور آخری روز سری لنکن ٹیم نے 231 رنز 6 کھلاڑی آئوٹ پر دوسری ادھوری اننگز دوبارہ شروع کی تو اسے فتح کیلئے مزید 429 رنز درکار تھے، کیویز بائولرز نے حریف بلے بازوں کو وکٹ پر سنبھلنے کا موقع نہ دیا اور پوری ٹیم گزشتہ دن کی اننگز کے سکور میں صرف 5 رنز کا اضافہ کرنے کے بعد 236 رنز بنا کر آئوٹ ہو گئی، دلروون پریرا 22، سرنگا لکمل 18 اور چمیرا 3 رنز بنا کر آئوٹ ہوئے، اینجلو میتھیوز زخمی ہونے کی وجہ سے دوبارہ بیٹنگ کیلئے نہ آ سکے۔