لاڑکانہ- شکارپور میں ذاتی دشمنی 2 جانیں نگل گئی

لاڑکانہ (نمائندگان) لاڑکانہ اور شکار پور میں ذاتی دشمنی دو جانیں نگل گئی۔ میرو خان چوک پر پو رکشہ ڈرائیور کو گولی ماری گئی جبکہ شکار پور میں اسماعیل معرفانی قتل کے2ملزم گرفتار کر لئے گئے۔ تفصیلات کے مطابق لاڑکانہ کے تھانہ حیدری کی حدود میروخان چوک روڈ پر نامعلوم مسلح افراد نے فائرنگ کرکے 29سالہ چنگ چی ڈرائیور گاؤں ہزار واہ کے رہائشی نوجوان نظر محمد عمرانی کو سخت زخمی کردیا، جبکہ واقعے کے بعد مسلح افراد فرار ہوگئے۔ اطلاع پر پولیس نے پہنچ کر واقعے کے متعلق تفصیلات معلوم کیں اور نوجوان کو تشویشناک حالت میں چانڈکا اسپتال کے شعبہ حادثات منتقل کیا جہاں وہ زخموں کے تاب نہ لاتے ہوئے دم توڑگیا۔ پولیس کے مطابق مقتول کو پرانی دشمنی کا باعث قتل کیا گیا ہے تاہم واقعے کی مختلف رخوں سے تفتیش کررہے ہیں اور ملوث ملزمان کو گرفتار کیا جائے گا۔