امریکی ریاستوں میں شدید برفباری- حادثات میں7 افراد ہلاک

واشنگٹن (امت نیوز) امریکہ میں شدید برف باری کے باعث مختلف حادثات میں7 افراد ہلاک ہوگئے۔ غیر ملکی خبر رساں ادارے کے مطابق امریکہ کی وسط مغربی ریاستیں شدید برفباری کی لپیٹ میں ہیں، میزوری، کنساس اور شکاگو میں برفباری کا سلسلہ جاری ہے، سینٹ لوئیس اور کولمبیا اور ملحقہ شہروں میں ایک دن میں 26سینٹی میٹر تک برف پڑچکی ہے، جبکہ کئی شہروں میں برفباری کا 100سالہ ریکارڈ ٹوٹ گیا ہے۔ برفباری سے سیکڑوں پروازیں تاخیر کا شکار اور کئی شہروں میں فلائٹ آپریشن مکمل طور پر معطل ہے۔ مختلف شہروں میں 700حادثات ہوئے،جن میں 7افراد ہلاک ہوگئے، مختلف شہروں میں ٹریفک کا نظام بھی شدید متاثر ہے، جہاں بھاری مشینری کی مدد سے سڑکوں کی صفائی جاری ہے۔