پاکستان آج بقا کی جنگ لڑے گا

جوہانسبرگ (اسپورٹس ڈیسک)پاکستان آج بقا کی جنگ لڑے گا۔جنوبی افریقہ اور پاکستان کی کرکٹ ٹیموں کے درمیان پانچ ایک روزہ بین الاقوامی میچوں پر مشتمل سیریز کا چوتھا اور اہم میچ (آج) اتوار کو جوہانسبرگ میں کھیلا جائے گا، میزبان ٹیم کو سیریز میں 2-1 کی برتری حاصل ہے، پاکستانی ٹیم نے پہلے ون ڈے انٹرنیشنل میچ میں میزبان ٹیم کو 5 وکٹوں سے شکست دے کر سیریز میں برتری حاصل کی تھی لیکن جنوبی افریقہ نے دوسرا میچ 5 وکٹوں سے جیت کر سیریز 1-1 سے برابر کر لی تھی، تیسرے ون ڈے میں بارش اور قسمت نے میزبان ٹیم کا بھرپور ساتھ دیا اور میزبان ٹیم ڈک ورتھ لوئس میتھڈ کے تحت 13 رنز سے فتح یاب رہی۔ پاکستانی ٹیم چوتھا میچ جیت کر سیریز میں کم بیک کرنے کیلئے پر جوش دکھائی دے رہی ہے دوسری جانب جنوبی افریقن کھلاڑی بھی سیریز میں فیصلہ کن برتری حاصل کرنے کیلئے پر عزم ہیں۔