بنگلہ دیش پریمیئر لیگ میں وہاب ریاض کی ہیٹ ٹرک

ڈھاکہ (امت نیوز) بنگلہ دیش پریمیئر لیگ میں ایون لیوس کی ناقابل شکست سنچری اور وہاب ریاض کی شاندار ہیٹرک کی بدولت کومیلا وکٹورینز نے کھلنا ٹائٹنز کو بآسانی 80 رنز سے ہرا کر چھٹی کامیابی حاصل کر لی، اس فتح کے ساتھ ہی وکٹورینز نے پوائنٹس ٹیبل پر ٹاپ پوزیشن پر قبضہ جما لیا، لیوس نے شاندار سنچری اور وہاب ریاض نے ہیٹرک کر کے ٹیم کی جیت میں کلیدی کردار ادا کیا، لیوس میچ کے بہترین کھلاڑی قرار پائے۔ پیر کو کھیلے گئے میچ میں کومیلا وکٹورینز نے پہلے کھیلتے ہوئے مقررہ اوورز میں 5 وکٹوں پر 237 رنز بنائے، ایون لیوس نے جارحانہ انداز اپناتے ہوئے حریف بالرز کی خوب دھنائی کی اور سنچری بنا کر ٹیم کی پوزیشن مستحکم کی، لیوس نے10 چھکوں اور 5 چوکوں کی مدد سے 109 رنز کی ناقابل شکست اننگز کھیلی۔ ادھر وہاب ریاض بنگلہ دیش پریمیئر لیگ میں ہیٹ ٹرک کرنے والے پاکستان کے دوسرے اور مجموعی طور پر چوتھے بالر بن گئے۔ بی پی ایل میں اس سے قبل ہیٹرک کرنے کا اعزاز پاکستان کے محمد سمیع، بنگلہ دیش کے العمین حسین اور ایلس اسلام کو حاصل ہے۔