اسپینش لالیگا میں میسی کی شاندار ہیٹرک

بارسلونا(امت نیوز)اسپینش لالیگا فٹ بال لیگ میں لائنل میسی کی شاندار ہیٹرک کی بدولت بارسلونا نے سیویلا کو 4-2 گولز سے شکست دے دی، اس کامیابی کے ساتھ بارسلونا کو پوائنٹس ٹیبل پر دوسرے نمبر کی ٹیم پر 10 پوائنٹس کی واضح برتری حاصل ہو گئی ہے۔ اسپینش لالیگا کے سلسلے میں کھیلے گئے میچ میں بارسلونا نے شاندار کھیل پیش کرتے ہوئے سیویلا کو 2 کے مقابلے میں 4 گولز سے زیر کر کے کامیابی حاصل کی، میسی نے عمدہ کارکردگی کا مظاہرہ کرتے ہوئے ہیٹرک کر کے ٹیم کی جیت میں کلیدی کردار ادا کیا، سوریز نے ایک گول کیا، سیویلا کی طرف سے نواس اور مرکیڈو نے ایک، ایک گول کیا۔ شہرہ آفاق ارجنٹائن اور بارسلونا کے فٹ بالر لائنل میسی نے 50ویں ہیٹرک کر ڈالی، کیریئر کے 650 گولز بھی مکمل کر لئے۔ انہوں نے اسپینش لالیگا فٹ بال لیگ میں سیویلا کے خلاف میچ میں شاندار ہیٹرک کر کے یہ کارنامہ انجام دیا، یہ ان کے کیریئر کی 50ویں ہیٹرک ہے، اس کے ساتھ ساتھ انہوں نے کیریئر کے 650 گولز بھی مکمل کر لئے۔
٭٭٭٭٭