قربانی کے 16جانوررچوری۔بیوپاری سے 6 لاکھ چھن گئے

کراچی (اسٹاف رپورٹر)بلدیہ میں مسلح ملزمان باڑے سے 12 بڑے جانور چھین کر فرار ہو گئے۔ کورنگی میں گھر سے4 بکرے چوری ہو گئے، بیوپاری سے ساڑھے 6 لاکھ روپے چھن گئے۔ تفصیلات کے مطابق موچکو کے علاقے بلدیہ رئیس گوٹھ میں واقع جانوروں کے باڑے میں ایک درجن سے زائد مسلح ملزمان نے دھاوا بول دیا اور ایک درجن سے زائد بڑے جانور چھین کر ٹرک میں ڈال کرفرار ہو گئے۔ پولیس نے کہا کہ واردات کی اطلاع ملی ہے، تاہم کسی نے پولیس سے رابطہ نہیں کیا ہے۔ کورنگی مہران ٹاؤن سیکٹر 6 جی کے گھرسےنامعلوم ملزمان علی الصبح صحن میں بندھے 4 بکرے چوری کرکے لے گئے۔ متاثرہ شخص خادم چانڈیو نے بتایا کہ وہ قربانی کیلئے ایک لاکھ روپے کے 4 بکرے لائے تھے، چوری کی رپورٹ درج کرانے کے باجود پولیس چوروں کا سراغ نہیں لگا سکی ہے۔ ادھرسکھن کے علاقے بھینس کالونی روڈ نمبر5 پر واقع باڑے پر 2 مسلح موٹرسائیکل سوار بیوپاری کاشف سے ساڑھے 6 لاکھ روپے چھین کرفرار ہو گئے۔ کاشف نے‘‘امت ’’کوبتایا کہ بھینس کالونی میں لوٹ مار کی وارداتیں روکنے میں پولیس ناکام ہے۔