جوہر میں 2اغوا کار پکڑے گئے-مغوی بازیاب

کراچی (اسٹاف رپورٹر)اینٹی وائلنٹ کرائم سیل اور سی پی ایل سی نے گلستان جوہر میں مغوی کو بازیاب کرکے 2 اغوا کاروں کو گرفتار کرلیا، ملزمان سے تاوان کے 5 لاکھ روپے بھی برآمد کئے گئے ہیں۔ تفصیلات کے مطابق اینٹی وائلنٹ کرائم سیل پولیس اور سی پی ایل سی نے گلستان جوہر کے قریب مشترکہ کارروائی کرتے ہوئے 2 اغوا کاروں محمد حارث اور محمد اسامہ کو گرفتار کرکے مغوی احسن عارف کو بازیاب کرالیا۔ پولیس کا کہنا ہے کہ مغوی کے والد عارف بھٹی نے بیٹے کی رہائی کیلئے 8 اگست کو اغوا کاروں کو 5لاکھ روپے تاوان دیا تھا، تاہم ملزمان نے مغوی کو رہا نہیں کیا تھا، جس پر مغوی کے والد عارف بھٹی نے مقدمہ درج کروایا، جس کے بعد اینٹی وائلنٹ کرائم سیل پولیس نے فوری آپریشن کرتے ہوئے ملزمان کو گرفتار کرکے ان سے تاوان کی رقم اور مغوی کو با حفاظت بازیاب کرالیا۔