گلبرگ میں حسینہ سمیت 7 رکنی ڈکیت گروپ پکڑا گیا-کار و اسلحہ برآمد

کراچی (اسٹاف رپورٹر)گلبرگ میں حسینہ سمیت 7 رکنی ڈکیت گروپ کو گرفتار کر کے کار اور اسلحہ برآمد کر لیا گیا، ملزمان نے متعدد گھر لوٹنے اور اسٹریٹ کرائمز واردتوں کا اعتراف کیا ہے۔ تفصیلات کے مطابق گلبرگ پولیس نےبلاک 6ایف بی ایریا میں کارروائی کے دوران سفید کرولا میں سوارملزمان اختر عرف قاری ، عابد علی عرف منا، رحمت اللہ عرف دتہ، خادم حسین، عابد عباس عرف جٹ، غلام فرید اور شہناز عرف مسکان کو گرفتار کرکے اسلحہ برآمد کرلیا۔ پولیس کا کہناہے کہ شہناز سمیت دیگر ملزمان پہلے بھی گرفتار ہوچکے ہیں۔ پولیس کے مطابق ملزمان سے ملنے والا پستول 28اگست کو بہادر آباد میں سیکورٹی گارڈ سے چھینا گیا تھا، جس کی سی سی ٹی وی فوٹیج موجود ہے، ملزمان نے دوران تفتیش گلشن اقبال، جوہر، کورنگی، بہادرآباد اور نیوکراچی سمیت دیگر علاقوں میں متعدد گھر لوٹنے اور اسٹریٹ کرائمزوارداتوں کا اعتراف کیا ہے۔