سینٹکام نے ایران پر تازہ کارروائی مکمل کرنے کا اعلان کردیا
مشرقِ وسطیٰ میں اس وقت 50 ہزار سے زائد امریکی فوجی اہلکار تعینات ہیں، جو خطے کی صورتحال پر مسلسل نظر رکھے ہوئے ہیں۔
فائل فوٹو
واشنگٹن: امریکی سینٹرل کمانڈ (سینٹکام) نے اعلان کیا ہے کہ امریکی افواج نے ایران میں فوجی اہداف کے خلاف تازہ فضائی کارروائیوں کا ایک مرحلہ مکمل کرلیا ہے۔
سینٹکام کے مطابق امریکی کارروائی کے دوران ایرانی پاسدارانِ انقلاب سے منسلک متعدد اہداف کو نشانہ بنایا گیا۔ ان میں فضائی دفاعی تنصیبات، ریڈار سسٹمز، بحری اثاثے اور مختلف فوجی مراکز شامل تھے۔
امریکی کمانڈ کے مطابق کارروائی میں ان نظاموں اور مواصلاتی مراکز کو بھی ہدف بنایا گیا جو بارودی سرنگیں بچھانے کی صلاحیت رکھتے ہیں یا فوجی رابطوں کے لیے استعمال کیے جاتے ہیں۔
سینٹکام کا کہنا ہے کہ یہ کارروائی آبنائے ہرمز میں تجارتی جہازوں کے خلاف مبینہ حملوں کی کوششوں اور امریکی فوجی اہلکاروں کو نشانہ بنانے سے متعلق پاسدارانِ انقلاب کی حالیہ سرگرمیوں کے بعد کی گئی۔
امریکی فوجی حکام کے مطابق مشرقِ وسطیٰ میں اس وقت 50 ہزار سے زائد امریکی فوجی اہلکار تعینات ہیں، جو خطے کی صورتحال پر مسلسل نظر رکھے ہوئے ہیں۔
سینٹکام نے مزید کہا کہ امریکی افواج صدر کی ہدایات کے مطابق خطے میں مزید فوجی کارروائیوں کے لیے تیار ہیں، جبکہ مشرقِ وسطیٰ میں جاری کشیدگی کے باعث صورتحال پر کڑی نظر رکھی جا رہی ہے۔