مشرق وسطیٰ میں کشیدگی، عالمی مارکیٹ میں خام تیل 122 ڈالر تک پہنچ گیا
جمعرات کو برینٹ خام تیل کی قیمت میں تقریباً ایک فیصد اضافہ ہوا اور یہ 108.68 ڈالر فی بیرل ہوگئی۔
فائل فوٹو
مشرق وسطیٰ میں بڑھتی ہوئی کشیدگی کے باعث عالمی منڈی میں خام تیل کی قیمتوں میں ایک بار پھر نمایاں اضافہ دیکھا گیا ہے۔
رپورٹس کے مطابق مربن خام تیل کی قیمت 122 ڈالر فی بیرل تک پہنچ گئی، جبکہ جمعرات کو برینٹ خام تیل کی قیمت میں تقریباً ایک فیصد اضافہ ہوا اور یہ 108.68 ڈالر فی بیرل ہوگئی۔
امریکی خام تیل ویسٹ ٹیکساس انٹرمیڈیٹ کی قیمت بھی مئی کے وسط کے بعد بلند ترین سطح پر پہنچ گئی۔ اس کی قیمت میں 6.7 فیصد اضافہ ریکارڈ کیا گیا اور کاروبار کے اختتام پر یہ 103 ڈالر فی بیرل رہی۔
یمن میں حوثیوں کی جانب سے ساحلی شہر موخا پر قبضے اور آبنائے ہرمز میں مزید بحری جہازوں کو نشانہ بنائے جانے کی اطلاعات کے بعد عالمی توانائی کی ترسیل متاثر ہونے کے خدشات بڑھ گئے ہیں، جس کے باعث تیل کی قیمتوں پر بھی دباؤ بڑھ رہا ہے۔