امریکی مخالفت ناکام، ایران آئی اے ای اے کی جنرل کمیٹی کا رکن منتخب

ویانا: ایران بین الاقوامی ایٹمی توانائی ایجنسی (آئی اے ای اے) کی جنرل کانفرنس کی جنرل کمیٹی کا رکن منتخب ہوگیا ہے۔

ایرانی مشن کے مطابق رکن ممالک نے ووٹنگ کے ذریعے ایران کے حق میں فیصلہ دیا۔ ایرانی حکام کا کہنا ہے کہ امریکا نے ایران کو کمیٹی کا رکن منتخب ہونے سے روکنے کی کوشش کی تھی، تاہم یہ کوشش کامیاب نہیں ہوسکی۔

ایران کی اٹامک انرجی آرگنائزیشن کے ترجمان بہروز کمال واندی کے مطابق امریکی مخالفت کے باوجود ایران نے جنرل کمیٹی میں جگہ حاصل کرلی۔

یہ پیش رفت ایسے وقت میں سامنے آئی ہے جب ایران اور امریکا کے درمیان تہران کے جوہری پروگرام کے معاملے پر کشیدگی برقرار ہے۔

چند روز قبل ایرانی اٹامک انرجی آرگنائزیشن کے سربراہ محمد اسلامی کو آئی اے ای اے کی جنرل کانفرنس میں شرکت کے لیے سفری استثنا نہ ملنے پر ایران نے احتجاج کیا تھا۔ ایرانی حکام نے اس اقدام کو رکن ملک کے حقوق کی خلاف ورزی قرار دیتے ہوئے کہا تھا کہ ایران کو ایجنسی کے اجلاسوں میں مکمل اور مؤثر شرکت کا حق حاصل ہے۔

آئی اے ای اے کی جنرل کمیٹی جنرل کانفرنس کے انتظامی اور طریقہ کار سے متعلق معاملات میں اہم کردار ادا کرتی ہے۔ ایران کی اس کمیٹی میں شمولیت ایسے وقت میں ہوئی ہے جب اس کے جوہری پروگرام اور آئی اے ای اے کے ساتھ تعاون کا معاملہ عالمی توجہ کا مرکز بنا ہوا ہے۔