ایران کا امریکی نقصانات سے متعلق مزید معلومات جاری کرنے کا اعلان

تہران: ایرانی وزیر خارجہ عباس عراقچی نے کہا ہے کہ ایران امریکا کے ساتھ جاری جنگ کے دوران امریکی نقصانات سے متعلق مزید تفصیلات مناسب وقت پر سامنے لائے گا۔

عباس عراقچی نے سوشل میڈیا پلیٹ فارم ایکس پر اپنے بیان میں امریکی مؤقف کو مسترد کرتے ہوئے کہا کہ ایران کو بے دفاع سمجھنا درست نہیں۔ انہوں نے امریکی محکمہ دفاع کی حالیہ رپورٹ کو امریکی نقصانات سے متعلق معلومات کا صرف ابتدائی حصہ قرار دیا۔

ایرانی وزیر خارجہ کے مطابق جنگ کے دوران متعدد امریکی فوجی مقامات اور فوجی سازوسامان کو نقصان پہنچا، جبکہ امریکی طیارے اور ڈرونز بھی متاثر ہوئے۔ تاہم عراقچی کی جانب سے پیش کیے گئے بعض مخصوص اعداد و شمار کی آزادانہ طور پر مکمل تصدیق نہیں ہوئی۔

دوسری جانب امریکی محکمہ دفاع کے انسپکٹر جنرل کی حالیہ رپورٹ میں بتایا گیا ہے کہ 28 فروری سے 30 جون 2026 تک ایران کے خلاف فوجی کارروائی پر امریکا کے اندازاً 33.4 ارب ڈالر خرچ ہوئے۔ ان میں 22.3 ارب ڈالر استعمال کیے گئے ہتھیاروں اور گولہ بارود پر خرچ ہوئے جبکہ فوجی سازوسامان کے نقصانات کا تخمینہ 3.7 ارب ڈالر لگایا گیا۔

رپورٹ کے مطابق ایرانی حملوں سے مشرق وسطیٰ کے مختلف ممالک میں قائم امریکی فوجی اڈوں پر سیکڑوں عمارتوں اور دیگر تنصیبات کو نقصان پہنچا۔ رپورٹ میں امریکی فوجی سازوسامان کے نقصانات اور ہتھیاروں کے ذخیرے میں کمی کی بھی نشاندہی کی گئی ہے

امریکی انسپکٹر جنرل کی رپورٹ میں مزید کہا گیا ہے کہ جنگ میں بڑی مقدار میں ہتھیار استعمال ہونے کے باعث بعض اہم امریکی اسلحہ ذخائر میں کمی ہوئی اور انہیں دوبارہ بھرنے کے عمل میں دفاعی صنعت کو سپلائی سے متعلق مشکلات کا سامنا ہے۔

عباس عراقچی نے اپنے بیان میں مؤقف اختیار کیا کہ امریکی نقصانات سے متعلق مکمل تصویر ابھی سامنے نہیں آئی اور ایران مستقبل میں اس حوالے سے مزید معلومات جاری کرے گا۔