سندھ کے 5 اضلاع کے ماحولیاتی نمونوں میں پولیو وائرس کی تصدیق

 ایمرجنسی آپریشن سینٹر (ای او سی) سندھ نے اگست میں صوبے بھر سے لیے گئے ماحولیاتی نمونوں کے اعداد و شمار جاری کر دیے ہیں۔ جاری کردہ رپورٹ کے مطابق سندھ کے 5 اضلاع میں ماحولیاتی نمونوں کے اندر پولیو وائرس کی تصدیق ہو گئی ہے۔

رپورٹ کے مطابق کراچی کے ضلع غربی، کورنگی، وسطی اور جنوبی کے 1، 1 ماحولیاتی نمونے میں پولیو وائرس پایا گیا ہے، جبکہ حیدرآباد کے 2 ماحولیاتی نمونوں میں بھی پولیو وائرس کی موجودگی کی تصدیق ہوئی ہے۔

دوسری جانب صوبے کے دیگر اضلاع میں صورتحال تسلی بخش رہی۔ ای او سی کے مطابق ضلع شرقی، کیماڑی اور ملیر کے ماحولیاتی نمونوں میں پولیو وائرس نہیں پایا گیا۔ اس کے علاوہ گھوٹکی، سکھر، جیکب آباد، قمبر، لاڑکانہ، کشمور، دادو، بدین، جامشورو، سجاول، میرپور خاص اور سانگھڑ کے ماحولیاتی نمونے بھی منفی رہے ہیں۔

ایمرجنسی آپریشن سینٹر سندھ کا کہنا ہے کہ جن اضلاع میں ماحولیاتی نمونے مثبت آئے ہیں، وہاں انسدادِ پولیو ویکسینیشن مہم اور دیگر حفاظتی اقدامات پر خصوصی توجہ دی جائے گی تاکہ وائرس کے پھیلاؤ کو روکا جا سکے۔