صدر زرداری سے محسن نقوی کی ملاقات، سکیورٹی صورتحال پر گفتگو

صدر مملکت آصف علی زرداری سے وفاقی وزیر داخلہ محسن نقوی نے کراچی میں ملاقات کی، جس میں ملک کی مجموعی صورتحال اور سکیورٹی معاملات پر تبادلہ خیال کیا گیا۔

ملاقات کے دوران وزیر داخلہ نے صدر مملکت کو ملکی سکیورٹی کی صورتحال سمیت اہم امور سے آگاہ کیا۔ دونوں رہنماؤں کے درمیان ملک میں امن و امان سے متعلق معاملات بھی زیر بحث آئے۔

دوسری جانب خیبر پختونخوا اور بلوچستان میں سکیورٹی فورسز کی دہشت گردوں کے خلاف کارروائیاں جاری ہیں۔ سکیورٹی ذرائع کے مطابق مختلف کارروائیوں میں 7 دہشت گرد ہلاک ہوئے جبکہ بڑی مقدار میں اسلحہ اور گولہ بارود بھی برآمد کیا گیا۔

ذرائع کے مطابق خیبر پختونخوا کے علاقے باڑہ میں عزمِ استحکام کے تحت خفیہ اطلاع پر کارروائی کی گئی، جس کے دوران فتنۃ الخوارج سے تعلق رکھنے والے 5 دہشت گرد ہلاک ہوئے۔

کارروائی میں دہشت گردوں کے ٹھکانوں کو تباہ کرنے کے ساتھ بڑی تعداد میں اسلحہ اور گولہ بارود بھی قبضے میں لیا گیا۔ سکیورٹی ذرائع کے مطابق کارروائیوں کے دوران دیگر دہشت گردوں کے خلاف بھی کارروائیاں جاری رہیں۔