لانگ مارچ کی تیاریاں، حکومت اور اپوزیشن میں کل ملاقات کا امکان

میڈیا رپورٹس اور پارٹی ذرائع کے مطابق چیئرمین پی ٹی آئی بیرسٹر گوہر خان نے تصدیق کی ہے کہ حکومت کی جانب سے کل ملاقات کا پیغام موصول ہوا ہے، جسے آج کے اپوزیشن اجلاس میں ہونے والے فیصلے کی روشنی میں قبول کر لیا گیا ہے۔ طے شدہ شیڈول کے مطابق کل دوپہر 12 بجے اسپیکر قومی اسمبلی کے چیمبر میں حکومتی اور اپوزیشن وفود کے درمیان اہم ملاقات ہوگی۔

پارلیمنٹ ہاؤس میں میڈیا سے گفتگو کرتے ہوئے بیرسٹر گوہر خان کا کہنا تھا کہ لانگ مارچ ایک جمہوری حق ہے اور یہ ہر صورت پُرامن ہوگا۔ انہوں نے واضح کیا کہ خیبر پختونخوا میں کسی قسم کا گورنر راج یا ایمرجنسی نہیں لگنی چاہیے کیونکہ ایسی کوئی صورتحال موجود نہیں ہے۔ انہوں نے مزید کہا کہ وزیراعلیٰ خیبر پختونخوا سے متعلق پارٹی کی پالیسی واضح ہے اور تمام امور کو جمہوری انداز میں آگے بڑھایا جا رہا ہے۔

دوسری جانب اسلام آباد میں منعقدہ اپوزیشن اتحاد کے اہم اجلاس میں لانگ مارچ کے آئندہ کے لائحہ عمل، خیبرپختونخوا میں ایمرجنسی کی خبروں اور ملک کی مجموعی سیاسی صورتحال پر تفصیلی غور کیا گیا۔ اجلاس کے بعد میڈیا سے گفتگو کرتے ہوئے سینیٹ میں قائد حزب اختلاف علامہ راجا ناصر عباس اور دیگر رہنماؤں کا کہنا تھا کہ ملک کو اس وقت گہرے سیاسی اور معاشی بحران کا سامنا ہے، اور مسائل کا حل طاقت کے استعمال کے بجائے سیاسی مذاکرات میں پوشیدہ ہے۔ اپوزیشن اتحاد نے تصدیق کی کہ احتجاج کے ساتھ ساتھ حکومت کے ساتھ مذاکرات کا آپشن بھی کھلا رکھا جائے گا تاکہ کشیدگی کو کم کیا جا سکے کل ہونے والی ملاقات میں اس حوالے سے مزید پیش رفت متوقع ہے۔