ڈی جی آئی ایس پی آر نے کے پی حکومت سے متعلق واضح پیغام دیا، خواجہ آصف

اسلام آباد: وفاقی وزیر دفاع خواجہ آصف نے کہا ہے کہ ڈی جی آئی ایس پی آر لیفٹیننٹ جنرل احمد شریف چودھری نے گزشتہ روز کی پریس کانفرنس میں خیبرپختونخوا حکومت سے متعلق سخت سوالات اور مؤقف واضح کردیا ہے۔

سوشل میڈیا پر جاری اپنے بیان میں خواجہ آصف نے کہا کہ دہشتگردی کے معاملے کو سیاست کے پیچھے چھپنے کے لیے استعمال نہیں کیا جاسکتا۔ ان کے مطابق ڈی جی آئی ایس پی آر نے بھی اپنی گفتگو میں دہشتگردی کے خلاف جنگ کو اہم قرار دیتے ہوئے واضح مؤقف اختیار کیا۔

وفاقی وزیر دفاع نے سوال اٹھایا کہ جب ریاست دہشتگردی کے خلاف کارروائی کررہی ہے تو خیبرپختونخوا حکومت اس معاملے میں آگے بڑھ کر اپنا کردار کیوں ادا نہیں کرتی۔ انہوں نے پولیس کی استعداد کار بڑھانے کے اقدامات سے متعلق بھی سوالات اٹھائے۔

خواجہ آصف کا کہنا تھا کہ ڈی جی آئی ایس پی آر کی پریس کانفرنس میں خیبرپختونخوا حکومت سے متعلق کئی معاملات واضح کیے گئے اور یہ ایک واضح پیغام ہے کہ دہشتگردی کے معاملے پر پہلے جیسی صورتحال جاری نہیں رہ سکتی۔

انہوں نے کہا کہ ملک کے لیے ریاستی نظام کا مضبوط ہونا بنیادی اہمیت رکھتا ہے۔ ان کے مطابق ریاست کے استحکام کے ساتھ ہی سیاست، جمہوریت اور شہریوں کے حقوق کا تحفظ ممکن ہے۔

واضح رہے کہ ڈی جی آئی ایس پی آر لیفٹیننٹ جنرل احمد شریف چودھری نے یکم اکتوبر کی پریس کانفرنس میں دہشتگردی کے خلاف جنگ کو اہم قرار دیتے ہوئے کہا تھا کہ اسے کسی کی سیاست کی نذر نہیں کیا جاسکتا۔ انہوں نے افغانستان سے ہونے والی دہشتگردی کے تناظر میں پاکستان کے دفاعی اقدامات اور ریاستی مؤقف بھی بیان کیا تھا۔