خیبرپختونخوا حکومت کی دہشتگردوں سے ملی بھگت ہے، خواجہ آصف کا سنگین الزام

اسلام آباد (نیوز ڈیسک) وفاقی وزیر دفاع خواجہ محمد آصف نے دعویٰ کیا ہے کہ خیبرپختونخوا میں پاکستان تحریک انصاف (پی ٹی آئی) کی صوبائی حکومت کی دہشتگردوں کے ساتھ مکمل ملی بھگت اور سہولت کاری کے وافر شواہد موجود ہیں۔ انہوں نے کہاکہ صوبائی حکومت کی دہشتگردی سے مکمل لاتعلقی اور مجرمانہ بے حسی بدستور جاری ہے، اور اب یہ صورتحال ناقابل برداشت ہو چکی ہے۔

وزیر دفاع نے اپنے بیان میں کہا کہ ایک ایسے وقت میں جب پی ٹی آئی کی قیادت اپنے نام نہاد اور ناکام سیاسی لانگ مارچ کے لیے سڑکوں پر سرگرداں ہے، صوبے کے اندر دہشتگردوں کی تازہ لہر نے جڑوں کو مضبوط کرنا شروع کر دیا ہے۔ 6 اکتوبر کو ڈیرہ اسماعیل خان میں دہشتگردوں کی فائرنگ سے 2 کسٹم اہلکاروں سمیت 5 بے گناہ شہری جاں بحق ہو گئے، لیکن وزیراعلیٰ اور ان کی پوری کابینہ نے اس المناک واقعے پر نہ تو کوئی مذمت کی اور نہ ہی سوگوار خاندانوں سے تعزیت کرنے کی زحمت کی۔ وزیر دفاع کے مطابق، صوبائی حکومت کے اس طرزِ عمل سے واضح ہوتا ہے کہ کے پی کے عوام کو دہشتگردوں کے رحم و کرم پر چھوڑ دیا گیا ہے۔

دریں اثنا، وزیراعظم کے مشیر رانا ثناء اللہ نے ایک ٹی وی انٹرویو میں انکشاف کیا کہ بانی پی ٹی آئی کے علاج کے لیے لندن سے ڈاکٹر بلوایا گیا تھا اور انہیں جیل مینوئل کے مطابق تمام طبی سہولیات فراہم کی جا رہی ہیں۔ انہوں نے کہا کہ پی ٹی آئی کا لانگ مارچ مکمل طور پر ناکام ہو چکا ہے اور صوبائی حکومت اگر اپنی آئینی ذمہ داریاں پوری کرنے میں ناکام رہتی ہے تو ریاست کو سخت فیصلے کرنا ہوں گے۔

دُنیا نیوز سے خصوصی گفتگو کرتے ہوئے وزیر دفاع خواجہ آصف نے واضح کیا کہ دارالحکومت اسلام آباد کو کسی بھی جتھے کے رحم و کرم پر نہیں چھوڑا جائے گا، تاہم صوبے میں گورنر راج کا نفاذ آخری آپشن ہے جس سے گریز کی کوشش کی جا رہی ہے۔