اسلام آباد،لائبہ خودکشی کیس میں بڑی پیشرفت،ملزم سے 21 لاکھ روپے برآمد

اسلام آباد: امریکا کی ہارورڈ یونیورسٹی میں داخلے اور اسکالرشپ دلوانے کے نام پر مبینہ فراڈ کا شکار ہونے والی طالبہ لائبہ اعجاز کے خودکشی کیس میں اہم پیشرفت سامنے آئی ہے۔ وفاقی تحقیقاتی ادارے (ایف آئی اے) کے ذرائع کے مطابق مرکزی ملزم نعمان سے 21 لاکھ روپے برآمد کر لیے گئے ہیں۔

ذرائع کا کہنا ہے کہ ملزم کا ریکارڈ مختلف متعلقہ اداروں سے حاصل کیا جا رہا ہے۔ اسلام آباد کے محکمہ ایکسائز میں ملزم کا کوئی ریکارڈ موجود نہیں، جبکہ پولیس کے مطابق نعمان مانسہرہ میں فراڈ کے ایک مقدمے میں اشتہاری قرار دیا جا چکا ہے۔

ذرائع کے مطابق رقم کی برآمدگی سے متعلق کارروائی مکمل ہونے کے بعد ملزم کو مانسہرہ پولیس کے حوالے کیا جائے گا۔

مقدمے کی ایف آئی آر کے مطابق ملزم نعمان نے فاطمہ سرور اور عائزہ کے ساتھ مل کر لائبہ اعجاز کو امریکا کی ہارورڈ یونیورسٹی میں داخلہ اور اسکالرشپ دلوانے کا جھانسہ دیا۔ الزام ہے کہ ملزمان نے جعلی داخلہ ناموں، اسکالرشپ دستاویزات، یونیورسٹی کے پیشکش ناموں اور فیس کی رسیدوں کے ذریعے طالبہ سے مبینہ طور پر 93 لاکھ روپے وصول کیے۔

لائبہ کی خودکشی کے واقعے کے بعد سامنے آنے والے اس معاملے کی تحقیقات جاری ہیں، جبکہ ملزمان کے خلاف الزامات کی حتمی حیثیت کا تعین قانونی کارروائی کے بعد ہوگا۔