مراد سعید کی موجودہ لوکیشن افغانستان کی ہے، رانا ثنا اللہ

اسلام آباد: وزیر اعظم شہباز شریف کے مشیر برائے سیاسی امور رانا ثناء اللّٰہ کا کہنا ہے کہ مراد سعید کی جو موجودہ لوکیشن ہے وہ افغانستان کی ہے۔

 نجی ٹی وی سے گفتگو کرتے ہوئے رانا ثناء اللّٰہ نے کہا کہ مراد سعید افغانستان میں بیٹھ کر خیبر پختونخوا کی حکومت کو کنٹرول کر رہے ہیں، سہیل آفریدی کو وزیراعلیٰ بنانے میں بھی مراد سعید کا ہاتھ ہے۔

رہنما مسلم لیگ ن نے مزید کہا کہ بتایا جا رہا ہے بانی پی ٹی آئی سہیل آفریدی کو جانتے بھی نہیں تھے۔

انہوں نے کہا کہ ہم نے پوری نیک نیتی کے ساتھ ان کو مذاکرات میں وہ سب کچھ آفر کر دیا جو ان کی ڈیمانڈ تھی، مذاکرات کی ناکامی میں بنیادی کردار سہیل آفریدی اور اس کے پیچھے بیٹھے شخص مراد سعید کا ہے۔

رانا ثناء اللّٰہ نے مزید کہا کہ سیاسی لوگوں کے ساتھ بیٹھ کر مذاکرات کرنے یا معاملہ فہمی کرنے پر ان کا یقین ہی نہیں ہے، خیبر پختونخوا میں علی امین گنڈاپور کو کوئی ذمہ داری نہیں مل رہی، اس وقت خیبر پختونخوا کے لیے جو سیٹ اپ بنایا گیا ہے وہ سوچ سمجھ کر بنایا گیا ہے۔