ملک میں ٹیکس نیٹ کو وسعت دینا ناگزیر ہے،وفاقی وزیر خزانہ

وفاقی وزیر خزانہ محمد اورنگزیب نے کہا ہے کہ ملک میں ٹیکس نیٹ کو وسعت دینا ناگزیر ہے، جبکہ پائیدار معاشی ترقی کا حصول حکومت کی بنیادی ترجیحات میں شامل ہے۔ ان کے مطابق معیشت کو مستحکم بنانے کے لیے ٹیکس نظام میں اصلاحات کا عمل جاری ہے۔

وزارت خزانہ کے زیر اہتمام ٹیکس نظام میں اصلاحات سے متعلق ایک ورکشاپ سے خطاب کرتے ہوئے محمد اورنگزیب نے کہا کہ ٹیکس وصولیوں کا دائرہ بڑھانے کے لیے مختلف اقدامات کیے جا رہے ہیں۔ انہوں نے دعویٰ کیا کہ ٹیکس اصلاحات کے نتیجے میں مجموعی ملکی پیداوار کی شرح میں بہتری آئی ہے اور معاشی اصلاحات سے شرح نمو کو سہارا ملا ہے۔

وزیر خزانہ کا کہنا تھا کہ پاکستان کی معاشی ترقی کو پائیدار اور برآمدات پر مبنی بنانا ضروری ہے۔ انہوں نے بتایا کہ ترسیلات زر میں بھی تاریخی اضافہ ریکارڈ کیا گیا ہے، جو ملکی معیشت کے لیے اہم پیش رفت ہے۔

محمد اورنگزیب کے مطابق پاکستان کی معیشت منفی 0.3 فیصد شرح نمو سے بہتری کی جانب آئی ہے۔ انہوں نے بتایا کہ ایک وقت میں ملکی زرمبادلہ کے ذخائر صرف دو ہفتوں کی درآمدات کے لیے کافی رہ گئے تھے، تاہم اب ان ذخائر سے تین ماہ سے زائد کی درآمدات کی ضروریات پوری کی جا سکتی ہیں۔

وزیر خزانہ نے مزید کہا کہ گزشتہ چار برس کے دوران پاکستان کے بیرونی قرضوں میں چار ارب ڈالر کا اضافہ ہوا ہے۔ ان کا کہنا تھا کہ معاشی استحکام برقرار رکھنے اور ترقی کی رفتار بہتر بنانے کے لیے اصلاحات کا تسلسل ضروری ہے۔