فیصل آباد میں پرانی دشمنی پر فائرنگ سے 2 افراد قتل

فیصل آباد: تھانہ روشن والا کے علاقے میں دیرینہ دشمنی کے شاخسانے میں مخالفین کی بزدلانہ فائرنگ کے نتیجے میں 2 افراد موقع پر ہی جاں بحق ہو گئے۔

پولیس ذرائع کے مطابق افسوسناک واقعہ چک نمبر 236 رب کے قریب پیش آیا، جہاں مسلح ملزمان نے گھات لگا کر زبردست فائرنگ کر دی۔ فائرنگ کے نتیجے میں بشارت اور احسان نامی شہری شدید زخموں کی تاب نہ لاتے ہوئے موقع پر ہی دم توڑ گئے۔ واردات کو انجام دینے کے بعد ملزمان جائے وقوعہ سے فرار ہو گئے۔

واقعے کی اطلاع ملتے ہی پولیس کی بھاری نفری نے موقع پر پہنچ کر لاشوں کو تحویل میں لے لیا اور پوسٹ مارٹم کے لیے ہسپتال منتقل کر دیا۔

پولیس کے مطابق چک نمبر 236 رب کے قریب ملزمان نے فائرنگ کرکے بشارت اور احسان کو قتل کر دیا، واقعے کے بعد ملزمان موقع سے فرار ہوگئے۔

دوسری جانب سٹی پولیس آفیسر (سی پی او) تنویر حسین نے دوہرے قتل کے اس سنگین واقعے کا فوری نوٹس لیتے ہوئے ایس پی اقبال ٹاؤن سعید احمد سے جامع رپورٹ طلب کر لی ہے۔ سی پی او نے ملزمان کی فوری گرفتاری کے لیے خصوصی ٹیمیں تشکیل دینے اور علاقے میں ناکہ بندی کر کے ملزمان کو جلد از جلد قانون کے کٹہرے میں لانے کی ہدایت کی ہے۔