گورنر راج کے بعد چارسدہ اور نوشہرہ میں تجاوزات کے خلاف آپریشن

اسلام آباد: خیبرپختونخوا میں گورنر راج کے نفاذ کے بعد انتظامیہ نے تجاوزات کے خلاف کارروائیوں کا دائرہ بڑھاتے ہوئے چارسدہ اور نوشہرہ میں بھی آپریشن شروع کردیا ہے۔ اس سے قبل پشاور کے شیرپاؤ بازار میں بھی تجاوزات کے خلاف کارروائی کی گئی تھی۔

انتظامیہ کے مطابق شیرپاؤ بازار، چارسدہ اور نوشہرہ کے مختلف علاقوں میں سڑکوں اور بازاروں کے اطراف قائم غیر قانونی تعمیرات کو ہٹانے کے لیے کارروائیاں کی جارہی ہیں۔ اس سلسلے میں ضلعی انتظامیہ، ٹاؤن انتظامیہ اور متعلقہ محکمے مشترکہ طور پر حصہ لے رہے ہیں۔

حکام کا کہنا ہے کہ آپریشن کا مقصد عوامی گزرگاہوں کو تجاوزات سے پاک کرنا، سڑکوں کی حدود بحال کرنا اور ٹریفک کی روانی بہتر بنانا ہے۔

انتظامیہ نے واضح کیا ہے کہ تجاوزات کے خاتمے تک کارروائیاں جاری رہیں گی، جبکہ غیر قانونی تعمیرات دوبارہ قائم ہونے سے روکنے کے لیے بھی اقدامات کیے جائیں گے۔

شہریوں اور تاجروں سے اپیل کی گئی ہے کہ وہ سڑکوں، فٹ پاتھوں اور بازاروں میں غیر قانونی تجاوزات قائم نہ کریں اور کارروائیوں کے دوران انتظامیہ سے تعاون کریں۔