قومی اسمبلی کا اجلاس آج شام 4 بجے ہوگا، 16 نکاتی ایجنڈا جاری

اسلام آباد: قومی اسمبلی کا اجلاس آج شام 4 بجے منعقد ہوگا، جس کے لیے 16 نکاتی ایجنڈا جاری کر دیا گیا ہے۔ اجلاس میں مختلف قانونی مسودوں، قائمہ کمیٹی کی رپورٹس اور عوامی مسائل سے متعلق امور زیر بحث آئیں گے۔

اجلاس کے دوران نجکاری کمیشن ترمیمی بل 2026 اور اوگرا ترمیمی آرڈیننس 2026 ایوان میں پیش کیے جائیں گے۔ اس کے علاوہ لائف انشورنس نیشنلائزیشن ترمیمی بل 2026 اور پاکستان اسٹڈی سینٹرز ترمیمی بل 2026 منظوری کے لیے پیش کیے جانے کا امکان ہے۔

ایجنڈے میں اسلام آباد کیپیٹل ٹیریٹری لوکل گورنمنٹ ترمیمی بل 2026 سے متعلق قائمہ کمیٹی کی رپورٹ پیش کرنا بھی شامل ہے۔

قومی اسمبلی میں نیشنل فنڈ فار کلچرل ہیریٹیج ترمیمی بل 2026 اور نیٹنگ آف فنانشل ارینجمنٹس بل 2026 کو مشترکہ اجلاس میں بھیجنے سے متعلق تحاریک بھی پیش کی جائیں گی۔

اجلاس میں صدر مملکت کے پارلیمنٹ سے خطاب پر اظہار تشکر کی تحریک پر بحث ہوگی۔ اس کے علاوہ ڈی اے پی اور یوریا کھاد کی بڑھتی ہوئی قیمتوں سے متعلق توجہ دلاؤ نوٹس بھی ایجنڈے کا حصہ ہے۔

ایجنڈے کے مطابق اسلام آباد کے سیکٹرز ای الیون اور سی سولہ میں سی ڈی اے کی جانب سے معاوضہ ادا کیے بغیر مسماری کے معاملے پر بھی توجہ دلاؤ نوٹس پیش کیا جائے گا۔

اجلاس میں قانون سازی کے علاوہ عوامی مسائل اور مختلف سرکاری اقدامات سے متعلق امور پر بھی ارکان اظہار خیال کریں گے۔