علی امین گنڈاپور کا شاندانہ گلزار کو جواب، کہا آپ اتنی اہم نہیں کہ بار بار جواب دوں

اسلام آباد: پاکستان تحریک انصاف کے رہنما اور خیبر پختونخوا کے سابق وزیراعلیٰ علی امین گنڈاپور نے پارٹی رہنما شاندانہ گلزار کے سوالات پر ردعمل دیتے ہوئے کہا ہے کہ وہ ہر گروپ میں ان سے سوالات شروع کر دیتی ہیں، جبکہ وہ ہر جگہ ان کے سوالوں کا جواب دینے کے پابند نہیں ہیں۔

علی امین گنڈاپور نے شاندانہ گلزار کو مخاطب کرتے ہوئے کہا کہ انہیں دوسروں کے معاملات پر سوال اٹھانے کے بجائے اپنی کارکردگی کے بارے میں بھی بتانا چاہیے۔ انہوں نے کہا کہ ہر معاملے میں یہ پوچھنے کے بجائے کہ کس نے کیا کیا، یہ بھی واضح ہونا چاہیے کہ خود کیا اقدامات کیے گئے۔

سابق وزیراعلیٰ نے اپنے دورِ حکومت کا ذکر کرتے ہوئے کہا کہ پی ٹی آئی کارکنوں کی گرفتاریوں اور جیلوں میں بند افراد کے معاملات کو بہتر انداز میں دیکھا گیا تھا۔ ان کے مطابق گرفتار کارکنوں کے مقدمات، اہل خانہ اور ضمانتی مچلکوں سمیت مختلف امور پر توجہ دی گئی اور رہائی کے لیے بھی کوششیں کی گئیں۔

علی امین گنڈاپور نے مزید کہا کہ وہ ہر گروپ میں ہونے والی گفتگو کا بار بار جواب نہیں دے سکتے۔ ان کا کہنا تھا کہ ایک گروپ میں جواب دینے کے باوجود اگر دوبارہ سوالات شروع کر دیے جائیں تو ہر مرتبہ وضاحت دینا ممکن نہیں۔

پی ٹی آئی رہنما کے اس ردعمل میں شاندانہ گلزار کے ساتھ پارٹی کے اندرونی رابطوں اور کارکنوں سے متعلق معاملات پر اختلافات نمایاں ہوئے ہیں۔