خیبرپختونخوا میں دہشت گردی کے بجائے تجاوزات کے خلاف آپریشنز ہو رہے ہیں،شوکت یوسفزئی

خیبرپختونخوا کے سیکریٹری اطلاعات شوکت یوسفزئی نے رانا ثنا اللہ کے بیان پر ردعمل دیتے ہوئے کہا ہے کہ پی ٹی آئی نے کبھی دہشت گردی کے خلاف جنگ کی مخالفت نہیں کی۔ گورنر راج کی حکومت نے 16 دنوں میں ایسا کون سا کام کیا جو پی ٹی آئی نہیں کر رہی تھی؟

اپنے بیان میں شوکت یوسفزئی نے کہا کہ حکومت ضد اور انا میں پھنسی ہوئی ہے، معیشت تباہ ہو رہی ہے جبکہ مہنگائی اور بے روزگاری کا جن بے قابو ہو چکا ہے۔ حکومت ہر شعبے میں ناکام دکھائی دے رہی ہے۔ ملک کو اس نازک صورتحال سے نکالنے کے لیے تمام سیاسی جماعتیں اپنا کردار ادا کریں۔

شوکت یوسفزئی نے کہا کہ دہشت گردی کے خاتمے کے لیے ہمیشہ اداروں کا ساتھ دیا ہے، تاہم گورنر خیبرپختونخوا فیصل کریم کنڈی کی ترجیحات بدل رہی ہیں۔ دہشت گردی کے خلاف آپریشن کے بجائے تجاوزات کے خلاف آپریشن پر توجہ مرکوز کی گئی ہے، اور چند دنوں ہی میں پورا خیبرپختونخوا کھنڈرات میں بدل گیا ہے۔

انہوں نے کہا کہ ان حالات میں غریبوں سے روزگار چھیننا کوئی دانشمندی نہیں۔ پنجاب گندم پیدا کرنے والا صوبہ ہے، لیکن آج وہاں بھی آٹے کا بحران ہے۔ موجودہ بحرانوں کا حل صرف اور صرف مذاکرات ہیں۔