لاہور ہائیکورٹ : نورین نیازی سے بیٹیوں کی جیل میں ملاقات کرانے کا حکم

لاہور ہائیکورٹ نے بانی پی ٹی آئی کی بہنوں کی نظر بندی کے نوٹیفکیشن میں توسیع کے خلاف دائر درخواست پر سماعت کرتے ہوئے نورین نیازی کی دونوں بیٹیوں کو جیل میں ملاقات کی اجازت دے دی ہے۔ عدالت نے حکم دیا ہے کہ سکینہ اور شاہ ریز کی اپنی والدہ سے کل صبح 10 بجے جیل میں 1 گھنٹے کی ملاقات کرائی جائے۔

عدالتی احکامات کے مطابق اس سلسلے میں وکیل کی جانب سے ڈپٹی کمشنر لاہور کو باضابطہ درخواست دی جائے گی، جس پر ڈی سی لاہور فوری طور پر کل ملاقات کے انتظامات کو یقینی بنائیں گے۔ سماعت کے دوران جسٹس عبہر گل خان نے نورین نیازی اور عظمیٰ خان کی نظر بندی کے نوٹیفکیشن میں توسیع پر سخت نوٹس لیتے ہوئے ڈی سی لاہور کو ذاتی حیثیت میں 4 نومبر کو عدالت طلب کر لیا ہے، جبکہ علیمہ خانم کی نظر بندی کی توسیع کے خلاف دائر درخواست پر سماعت آئندہ ہفتے تک ملتوی کر دی گئی ہے۔

عدالتی حکم پر سیکرٹری داخلہ نے کیس سے متعلق تفصیلی رپورٹ عدالت میں پیش کی۔ اس موقع پر پنجاب حکومت کے وکیل نے عدالت کو آگاہ کیا کہ نورین نیازی کو طبعی ناسازی پر ہسپتال منتقل کیا گیا تھا جہاں ان کا مکمل علاج کرایا گیا، اور ڈاکٹرز کی خصوصی ہدایت کے بعد انہیں واپس جیل منتقل کر دیا گیا ہے۔ حکومتی وکیل نے مزید بتایا کہ دورانِ علاج 29 اکتوبر کو حاجرہ نیازی کی ان کی والدہ سے ملاقات بھی کروائی جا چکی ہے۔