یوکرین جنگ کے خاتمے کی کوششیں تیز، ماسکو میں امریکی وفد کی پیوٹن سے ملاقات

یوکرین کی جنگ کے خاتمے کے لیے سفارتی کوششیں تیز ہو گئی ہیں اور روس کے چیف مذاکرات کار ولادیمیر میڈنسکی نے کہا ہے کہ یوکرین کے ساتھ امن معاہدہ اب پہلے سے زیادہ قریب دکھائی دیتا ہے۔ خبر رساں اداروں کے مطابق ابوظبی میں روس اور یوکرین کے درمیان 2 روزہ مذاکرات کا نیا دور مکمل ہو گیا ہے جس کے بعد امریکی صدر کے داماد جیرڈ کشنر اور خصوصی نمائندے اسٹیو وٹکوف نے ماسکو میں روسی صدر ولادیمیر پیوٹن سے اہم ملاقات کی ہے۔

روسی سرکاری ٹی وی سے گفتگو کرتے ہوئے ولادیمیر میڈنسکی نے بتایا کہ امن معاہدے کی راہ میں پیش رفت ہوئی ہے، تاہم اب بہت کچھ یوکرین، امریکا اور یورپی ممالک کے کردار پر منحصر ہے۔ انہوں نے روس کے اس ہدف کو 1945 کی تاریخی کانفرنسوں سے تشبیہ دی جن میں دوسری عالمی جنگ کے بعد یورپ کے مستقبل کے فیصلے کیے گئے تھے۔ دریں اثنا، یوکرین کے چیف مذاکرات کار رستم عمروف نے بھی تصدیق کی ہے کہ مذاکرات میں کچھ پیش رفت ہوئی ہے لیکن فریقین کے درمیان بڑے اختلافات ابھی حل طلب ہیں اور مزید مشکل کام کرنا باقی ہے۔

ماسکو میں ہونے والی ملاقات کے بعد امریکی وفد کے ڈبلن جا کر یوکرینی صدر ولودیمیر زیلنسکی سے ملاقات کرنے اور انہیں ابوظبی مذاکرات کی تفصیلات سے آگاہ کرنے کا امکان ہے۔ جیرڈ کشنر نے ماسکو میں پیوٹن کے ساتھ ملاقات کے دوران ابوظبی میں زیرِ بحث آنے والی تجاویز پر مزید پیش رفت کی کوشش کی۔ ابوظبی مذاکرات کا ایک اہم مثبت نتیجہ روس اور یوکرین کے درمیان انسانی بنیادوں پر قیدیوں کے تبادلے پر اتفاق ہے جسے امریکی نمائندوں نے دونوں ممالک کے درمیان اب تک کا سب سے بڑا تبادلہ قرار دیا ہے۔

دوسری جانب، مذاکرات کے دوران یورپی ممالک کی شمولیت کے معاملے پر بھی بحث کی گئی ہے۔ جیرڈ کشنر نے یورپ کو مذاکرات میں شرکت کے لیے اپنا ایک نمائندہ نامزد کرنے کا مشورہ دیا تھا، تاہم ماسکو کو مذاکرات میں یورپی نمائندوں کی شمولیت کی تجویز پر اعتراضات کا سامنا ہے۔ روسی حکام کا مؤقف ہے کہ یورپی ممالک کی جانب سے اب تک کوئی ٹھوس امن تجویز پیش نہیں کی گئی۔ امریکی ثالثوں کے مطابق فریقین کے درمیان اعتماد کا فقدان اور علاقائی معاملات پر اختلافات اب بھی برقرار ہیں، اس لیے امن معاہدے کی حتمی کامیابی کا انحصار آئندہ کی ملاقاتوں پر ہوگا۔